İraqdakı zəlzələdə azərbaycanlı zəvvarlardan xəsarət alan yoxdur.
Noyabrın 12-də İran-İraq sərhədində, İraqın Süleymaniyyə əyalətində 10 kilometr dərinlikdə zəlzələ baş verib. İlkin məlumata görə, zəlzələ episentrində 7,3 bal gücündə olub. Ancaq zəlzələnin təsiri böyük bir ərazidə hiss olunub. Beynəlxalq Zəlzələ İnstitutunun məlumatına görə, zəlzələ İraq, İran, Türkiyə, Suriya, Küveyt, İordaniya, İsrail, BƏƏ, eləcə də, Cənubi Qafqaz regionunda - Azərbaycan, Gürcüstan və Ermənistanda hiss edilib.
Artıq təlafat barədə məlumatlar gəlib. İranda 211 nəfərin, Ərbildə 6 nəfərin öldüyü, İraqda 50-dən çox yaralının olduğu bildirilir. İranın Qəsri-Şirin şəhərində də tələfat qeydə alınıb.
Qeyd edək ki, yeraltı təkanlar İraqın Kərbəla şəhərində də hiss olunub. Hazırda Kərbəlada olan "Salam Tour" ziyarət şirkətinin nümayəndəsi Ceyhun Hacıyev bildirib ki, yeraltı təkanlar nəticəsində Kərbəlada əhali təlaşla küçələrə qaçıb. Ancaq şəhərdə dağıntı qeydə alınmayıb. Əhali isə uzun illərdir Kərbəlada zəlzələ olmadığını və təlaşın da bu səbəbdən daha çox olduğunu qeyd edib.
Mynews.az musavat.com-a istinadla bildirir ki, Azərbaycandan hazırda İraq ərazisində olan zəvvarlar arasında tələfat və xəsarət alanlar yoxdur. Hazırda azərbaycanlı zəvvarların böyük bir qismi Kərbəla şəhərindədir, bir qismi isə artıq geriyə qayıtmaq üçün yola çıxıb.
Hazırda Kərbəlada olan zəvvar Xatun Etibarqızı "Facebook" sosial şəbəkəsində yazıb: "İran və İraq sərhədində baş vermiş 7.2, bəzi məlumatlara görə 7.4 bal gücündəki zəlzələ Suriya, BƏƏ, Küveyt, İsrail, Türkiyə, İordaniya, Azərbaycan, Ermənistan və Gürcüstanda da hiss olunub. İraqın 8 kəndində dağıntılar var. Episentr Süleymaniyədir. Bizdən narahat olmayın, salamatçılıqdır. Ağa zəvvarına zamindir. İnşallah, vətənə sağ-salamat dönərik".
