Barselona hava limanı su altında qaldı

Dünya

20:31 30.11.2024

İspaniyada güclü yağışlar davam edir, leysan Valensiyadan ölkənin şimal-şərqinə, Barselonaya doğru hərəkət edib. Sosial şəbəkələrdə Barselona El Prat hava limanında suyun terminalı basdığını əks etdirən videolar yayılıb.

Şəhər hava limanında güclü yağış başlayıb və günün ortasına qədər 70 reys ləğv edilib, 17-si başqa hava limanlarına yönləndirilib.
Barselona qırmızı həyəcan vəziyyətindədir. İspaniyanın milli meteorologiya agentliyi AEMET, Barselona üçün "güclü yağış səbəbindən həddindən artıq təhlükə" olduğunu bildirərək qırmızı xəbərdarlıq etdi. Səlahiyyətlilər “həqiqətən zəruri olmadıqca səyahətdən çəkinməyi” tövsiyə edib.

Barselona İspaniyanın ekstremal hava şəraitindən təsirlənən daha bir bölgəsinə çevrilib. Ölənlərin sayının 200-ü keçdiyi Valensiyada bərpa və təmizləmə işləri davam edir.

Hava limanında daşqınlardan sonra Barselona uçuşları təxirə salınıb. Barselona hava limanının operatoru Aena bildirib ki, hava limanı güclü yağışın nəticələrini aradan qaldırmaq üçün “böhran komitəsi” yaradıb.