Rusiya səfirliyi: Suriyanı təcili tərk edin

Dünya

17:41 06.12.2024

Rusiyanın Suriyadakı səfirliyi vəziyyətin gərginləşməsi ilə əlaqədar rusları mövcud hava limanları vasitəsilə kommersiya reysləri ilə respublikanı tərk etməyə çağırıb. Mynews.az xəbər verir ki, bu barədə diplomatik nümayəndəliyin Telegram kanalında məlumat verilib.

“Suriyadakı ağır hərbi-siyasi vəziyyətlə əlaqədar Rusiyanın Dəməşqdəki səfirliyi Suriya Ərəb Respublikasında yaşayan Rusiya vətəndaşlarına mövcud hava limanları vasitəsilə kommersiya reysləri ilə ölkəni tərk etmək imkanını xatırladır”, - məlumatda deyilir.

Noyabrın 28-də Suriyanın silahlı müxalifət qrupları Hələb vilayətinin qərb bölgələrində hökumət qoşunlarına qarşı irimiqyaslı hücuma başlayıb. CNN xəbər verir ki, nəticədə silahlılar 13 yaşayış məntəqəsini, o cümlədən strateji əhəmiyyətli Urm əs-Suqra və Əncar şəhərlərini ələ keçirib.

Dekabrın 6-da Suriyanın “Şam FM” radiosu terrorçu qruplaşmaların Həma və Homs şəhərləri arasında yerləşən iri Rastan və Təlbişə yaşayış məntəqələrini ələ keçirdiyini bildirib.