Vladimir Zelenski NATO-dan alyansa üzvlükdən imtinaya görə kompensasiya olaraq Ukraynanı hava hücumundan müdafiə sistemləri ilə təmin etmək vədini yerinə yetirməsini tələb edib. Mynews.az xəbər verir ki, Ukrayna lideri özünün Telegram kanalında ölkəyə 12-15 belə sistemə ehtiyac olduğunu vurğulayıb və Qərb tərəfdaşlarının bu öhdəlikləri yerinə yetirmək üçün siyasi iradəyə malik olduğuna ümid etdiyini bildirib.
“Açığı, bizim tərəfdaşlarımız bilirlər: bizə daha 12-15 sistem lazımdır. Bu realdır. Əsas odur ki, tərəfdaşlarımızın siyasi iradəsidir”, - deyə Zelenski bildirib.
O, həmçinin əlavə edib ki, hava hücumundan müdafiə sistemlərinin tədarükü ilə bağlı bu öhdəliklər Qərb tərəfindən Ukraynanın NATO-ya dəvət edilməsinin mümkünsüzlüyünü qəbul etdikdən sonra verilib. Zelenskinin sözlərinə görə, Ukrayna müdafiə qabiliyyətinin gücləndirilməsinin bir hissəsi kimi dəstəyə ümid edir.
Bundan əvvəl Zelenski ABŞ-ın yeni seçilmiş prezidenti Donald Trampa Ukraynanı NATO-ya dəvət etməyi təklif edib və bunun münaqişəyə son qoymaq üçün aparılan danışıqlarda ölkənin mövqeyini gücləndirməyə kömək edəcəyini qeyd edib. Ali Radanın keçmiş spikeri Dmitri Razumkov bildirib ki, Zelenskinin prezident kimi fəaliyyəti Ukraynanın NATO-ya üzv olmaq şansını sıfıra endirir.
