Rusiya neftinin ixracı ABŞ və Böyük Britaniyanın yeni sanksiyalarından ciddi şəkildə təsirlənəcək, çünki Pekin və Dehli Rusiya neftinin əsas alıcıları olub. ABŞ-ın Rusiya neftinə qarşı yeni sanksiyaları Çin və Hindistan neft emalı şirkətlərini Yaxın Şərq, Afrika və Amerikadan başqa tədarükçülər axtarmağa məcbur edəcək. Mynews.az bu barədə bazar günü, yanvarın 12-də treyderlərə və analitiklərə istinadən məlumat yayıb.
Qeyd olunur ki, 2022-ci ildə G7 ölkələrinin tətbiq etdiyi Qərb sanksiyaları və qiymət məhdudiyyətləri Rusiya neftinin ticarətini Avropadan Asiyaya köçürdüyü üçün ABŞ-ın sanksiyalarına məruz qalan bir çox tanker Rusiya tərəfindən Hindistan və Çinə neft daşımaq üçün istifadə edilib.
Bəzi tankerlər də sanksiyalar altında olan İrandan neft daşıyırdı.
Agentliyin mənbələri bildiriblər ki, Rusiyanın neft ixracı yeni sanksiyalardan ciddi şəkildə təsirlənəcək və bu, Çin müstəqil neft emalı şirkətlərini emal hasilatını daha da azaltmağa məcbur edəcək.
Kpler-in gəmiçilik üzrə aparıcı analitiki Matt Wright qeyd edib ki, ABŞ sanksiyalarına məruz qalan gəmilərin 143-ü keçən il 530 milyon bareldən çox Rusiya xam neftini daşıyan neft tankerləridir ki, bu da ölkənin ümumi dəniz xammalı ixracının təxminən 42%-ni təşkil edir.
Bunlardan təxminən 300 milyon barel Çinə, qalan hissəsi isə Hindistana göndərilib.
"Bu sanksiyalar qısa müddətdə Rusiyadan xam neft çatdırmaq üçün mövcud olan gəmi parkını əhəmiyyətli dərəcədə azaldacaq və yük tariflərini artıracaq", - Rayt bildirib.
Sinqapurlu bir treyder qara siyahıya düşən tankerlərin son 12 ay ərzində Çinə gündə təxminən 900 min barel Rusiya nefti göndərdiyini bildirib.
Qeyd olunur ki, ötən ilin 11 ayı ərzində Rusiya neftinin Hindistana idxalı 2023-cü ilin eyni dövrü ilə müqayisədə 4,5% artaraq sutkada 1,764 milyon barel və ya Hindistanın ümumi idxalının 36%-ni təşkil edib.
Çinin həcmi, o cümlədən boru kəməri tədarükləri eyni dövrdə 2% artaraq 2,159 milyon barel və ya ümumi idxalın 20%-ni təşkil edib.
Xatırladaq ki, yanvarın 10-da ABŞ hakimiyyəti Rusiyanın neft sektoruna qarşı yeni irimiqyaslı sanksiyalar elan etmişdi. Yeni məhdudiyyətlər Rusiyanın energetika sektorunda birbaşa və ya dolayısı ilə Kremlin döyüş maşınını maliyyələşdirən 400-dən çox şəxs və təşkilatı hədəf alır. Həmin gün Böyük Britaniya da sanksiyalara qoşulub.
