“Yeni hücumlar olacaq” Putin kəşfiyyat məlumatlarını AÇIQLADI

Dünya

18:42 11.04.2017

“Suriyada yeni təxribatlar hazırlanır. Hədəf Suriya hakimiyyətini kimyəvi silahdan istifadədə ittiham etməkdir”.

Publika.az TASS agentliyinə istinadən xəbər verir ki, bunu Rusiya prezidenti Vladimir Putin italiyalı həmkarı Sergio Mattarella ilə danışıqlardan sonra keçirdiyi mətbuat konfransında bildirib.

“Bizdə müxtəlif mənbələrdən informasiya var ki, belə təxribatlar hazırlanır. Suriyanın başqa regionlarında, həmçinin Dəməşqin cənub şəhərətrafında hansısa bir maddəni atmağa və Suriyanın rəsmi hakimiyyətini ittiham etməyə hazırlaşırlar”, - Putin deyib.

Kreml lideri hesab edir ki, ABŞ-ın Suriyaya raket zərbələri ətrafında yaranan vəziyyət 2003-cü ildə İraqa hücumu xatırladır:

“Bu, 2003-cü il hadisələrini xatırladır. ABŞ-ın BMT Təhlükəsizlik Şurasındakı nümayəndələri İraqda guya kimyəvi silahın tapıldığını göstərirdilər. Bundan sonra İraqda hərbi kampaniya başlandı. Ölkənin dağıdılması terror təhlükəsinin artması və İŞİD-in yaranması ilə nəticələndi”.

Rusiya prezidentinin fikrincə, Avropa ölkələri ABŞ-ın Suriyaya zərbələrini dəstəkləyərək Donald Tramp administrasiyası ilə münasibətləri qaydaya salmağa çalışır.