Avropa Şurası Parlament Assambleyasının (AŞPA) 2016-cı ilin yanvarında keçirilmiş qış sessiyasında “Dağlıq Qarabağda və Azərbaycanın işğal olunmuş digər ərazilərində zorakılığın artması” adlı məruzə ilə çıxış edən britaniyalı deputat Robert Uolter bu günlərdə maraqlı açıqlamaları ilə yadda qalıb.
Publika.az xəbər verir ki, R.Uolter Ermənistanın mediasına açıqlamasında ermənilərin onun haqqında səsləndirdikləri ittihamlara cavab verib.
Bu məruzədən sonra erməni lobbisi və rəsmi İrəvan britaniyalı deputatın Bakı tərəfindən “satın alındığını” iddia etmişdi.
R.Uolter isə bunun mümkün olmadığını, yalan ittihamlar olduğunu bildirib.
“Mən heç vaxt heç bir hökumətdən pul götürməmişəm. Lakin Ermənistan nümayəndə heyətinin üzvlərindən biri mənim adımı korlanmış nümayəndələr sırasında çəkir. İndiyə qədər Makedoniya, Macarıstan və digər ölkələrlə bağlı məruzələr hazırlamışam. Hətta Ermənistandan keçirilən prezident seçkilərində də müşahidə missiyasının tərkibində idim. Lakin heç vaxt heç bir hökumətdən pul almamışam”, - deyə o vurğulayıb.
Britaniyalı deputat qeyd edib ki, Dağlıq Qarabağla bağlı məruzənin hazırlaması üçün onu insan haqlarının müdafiəsi Komissiyası məruzəçi olaraq seçib: “Çünki mən dedim ki, İrəvanda yaxşı dostlarım var, bir sıra nazirlər, o cümlədən Edvard Nalbandyanla yaxın dostam. Mən Edvard Nalbandyanın evində arvadı və özü ilə birlikdə nahar etmişəm. Bu münasibətlərə görə məni məruzəçi olaraq seçdilər. Lakin bu gün Nalbandyan mənimlə danışmır”.
